Shia Strength: ï¿½ Ali Valiyollah Group ï¿½ Kerbala gawahee day.

Tuesday, February 16, 2010

ï¿½ Ali Valiyollah Group ï¿½ Kerbala gawahee day.

Kerbala gawahee day

Fatimah ('a) kee baytee nay

baap kee shuja'at ko

sabr say badal daala

bha'ee kee rafaqat ka

haq ada kia kesa...

Kerbala gawahee day

baab-e-shehr-e-hikmat say

khema-gaah-e-nusrat tek

mehzar-e-shahadat tek

kesay kesay naam aa'ye

kia 'ajab muqaam aa'ye

haq kee pasdaree ko

farz jannay waalay

raah-e-haq mein kaam aa'ye

saath saath thee Zainab ('a)

Kerbala gawahee day

phir vo shaam bhee aa'ee

jab behen akelee thee

ik safar huwa anjaam

rayg-e-garm maqtal per

chend be-kafan laashay

bha'iyon bhateejon k

godiyon k paalon k

saath chalnay waalon k

saath denay waalon k

kuch jalay huwe khemay

kuch daaray huwe bachay

jin ka aasra Zainab ('a)

jin ka hosla Zainab ('a)

Kerbala gawahee day

Mashad-e-muqaddas say

ik neya safar aaghaaz

jis kee aik manzil Shaam

Shaam shaam-e-mazloomee

or vo khutba-e-Zainab ('a)

phir to bar-sar-e-darbar

poochhnay lagee dunya

zulm kee kahanee mein

daastaan-sara'on k

haashiye kahan tek hen

sochnay lagee dunya

minbar-e-Saloonee k

silsilay kahan tek hen

khayr k tahaffuz per

ghar lutanay waalon k

hoslay kahan tek hen

waqt nay gawahee dee

jabar k muqabil mein

sabr ka sabaq Zainab ('a)

mus.haf-e-shahadat ka

aakhree warq Zainab ('a)

ye jo dard mohkam hai

ye bhee ik gawahee hai

ye jo aankh pur-num hai

ye bhee ik gawahee hai

ye jo farsh-e-maatam hai

ye bhee ik gawahee hai

--
Iftikhar Arif